اپنا گھر خریدنے کے خواہشمند افراد کیلئے بڑی خوشخبری؛ حکومت نے بڑا فیصلہ کرلیا

فیڈرل بورڈ آف ریونیو (ایف بی آر) نے اسلام آباد میں جائیداد کی سرکاری قیمتوں میں نمایاں کمی کر دی ہے۔

اس فیصلے کا باقاعدہ نوٹیفکیشن جاری کر دیا گیا ہے۔ نئی ویلیوایشن کے تحت رہائشی اور کمرشل پراپرٹی کی قیمتوں میں 10 سے 30 فیصد تک کمی کی گئی ہے۔ اس اقدام سے خریداروں اور سرمایہ کاروں کو کچھ حد تک ریلیف ملنے کی توقع کی جا رہی ہے۔

ایف بی آر کے جاری کردہ اعلامیے کے مطابق نئی شرحوں کا اطلاق فوری طور پر ہوگا۔ پرانی عمارتوں کی قیمت میں بھی کمی کی گئی ہے۔ پانچ سال تک پرانی عمارتوں کی قیمت فی مربع فٹ کم کر دی گئی ہے۔ اسی طرح پانچ سال سے زیادہ پرانی عمارتوں کی ویلیو بھی کم کر دی گئی ہے۔ اس فیصلے کا مقصد مارکیٹ ریٹ کے قریب سرکاری قیمت لانا بتایا جا رہا ہے۔

مختلف سیکٹرز میں بھی واضح کمی دیکھی گئی ہے۔ بی-17 اور سی-14 جیسے علاقوں میں رہائشی پلاٹس کی قیمتیں پہلے کے مقابلے میں کافی کم کر دی گئی ہیں۔ بغیر قبضہ پلاٹس کی قیمت میں بھی کمی آئی ہے۔

اسی طرح سی-15 اور سی-16 میں بھی نئی ویلیو پہلے سے کم مقرر کی گئی ہے۔ ڈی-12 میں فلیٹس اور کمرشل پراپرٹی کی قیمتوں میں بھی نمایاں کمی کی گئی ہے، جس سے خریداروں کے لیے مواقع بڑھ سکتے ہیں۔

مہنگے علاقوں میں بھی کچھ حد تک ایڈجسٹمنٹ کی گئی ہے۔ ای-7 اور ای-11 جیسے سیکٹرز میں نئی قیمتیں مقرر کی گئی ہیں، تاہم یہ علاقے اب بھی مہنگے شمار ہوتے ہیں۔

 جی-13، جی-14 اور دیگر سیکٹرز میں بھی ویلیو کم کی گئی ہے۔ اس کے علاوہ شہر کے مضافاتی علاقوں جیسے بنی گالہ، چک شہزاد اور پارک ویو میں بھی جائیداد کی قیمتوں میں کمی کی گئی ہے۔

ایف بی آر نے واضح کیا ہے کہ دیہی علاقوں کی قیمتیں پہلے سے طے شدہ شرحوں کے مطابق رہیں گی۔ اگر کسی معاملے میں اختلاف پیدا ہوتا ہے تو زیادہ ویلیو کو مدنظر رکھا جائے گا۔