اسمارٹ میٹرز لازمی قرار؟ بجلی صارفین کیلئے بڑی خبر آگئی

پاکستان میں بجلی کے نظام کو جدید بنانے کے لیے اسمارٹ میٹرنگ کے بڑے منصوبے کا آغاز کر دیا گیا ہے۔

تفصیلات کے مطابق پاور ڈویژن اور بین الاقوامی مالیاتی ادارے آئی ایف سی کے درمیان ایک معاہدہ طے پایا ہے۔ اس معاہدے کے تحت ملک بھر میں تقریباً ایک کروڑ بجلی کنکشنز پر اسمارٹ میٹرز نصب کیے جائیں گے۔ اس منصوبے کے لیے ملکی اور غیر ملکی سرمایہ کاری بھی متوقع ہے۔

وزیراعظم کے وژن کے مطابق بجلی کے نظام کو مکمل طور پر ڈیجیٹل بنایا جا رہا ہے۔ اسمارٹ میٹرز کے ذریعے بجلی چوری پر قابو پانے میں مدد ملے گی۔ اس کے ساتھ ساتھ بلنگ کا نظام زیادہ شفاف اور درست ہوگا۔

عالمی سطح پر مسابقتی بولی کے عمل کے بعد اسمارٹ میٹرز کی قیمتوں میں تقریباً 40 فیصد کمی بھی سامنے آئی ہے۔ اس کمی سے منصوبے کی لاگت میں نمایاں کمی متوقع ہے اور اس پر عمل درآمد مزید آسان ہوگا۔

حکومت نے نئے بجلی کنکشن کے لیے اسمارٹ میٹرز کی تنصیب لازمی قرار دے دی ہے۔ اب روایتی میٹرز کا استعمال آہستہ آہستہ ختم کیا جا رہا ہے۔ یہ اقدام بجلی کے نظام کو جدید خطوط پر استوار کرنے کی طرف اہم قدم ہے۔

اس کے علاوہ تھری فیز صارفین کے تمام میٹرز کو مرحلہ وار اسمارٹ میٹرز میں تبدیل کیا جائے گا۔ کمرشل اور صنعتی صارفین کو بھی اس ڈیجیٹل نظام میں شامل کیا جا رہا ہے۔ ناقص میٹرنگ کے مسائل کو کم کرنے کے لیے بھی خصوصی اقدامات کیے گئے ہیں۔

نیپرا کی منظوری کے بعد اس منصوبے پر عمل درآمد میں تیزی آ گئی ہے۔ حکام کے مطابق اسمارٹ میٹرز کی تنصیب سے بجلی کی ریکوری بہتر ہوگی اور لائن لاسز میں کمی آئے گی۔