سونا خریدنے کے خواہشمند افراد کیلئے بڑی خبر آگئی

عالمی مارکیٹ میں جمعہ کے روز سونے کی قیمتیں تقریباً مستحکم رہیں تاہم مجموعی طور پر یہ مسلسل چوتھے ہفتے اضافے کی طرف گامزن دکھائی دیں۔ سرمایہ کار امریکا اور ایران کے درمیان ممکنہ امن معاہدے کی خبروں کو قریب سے دیکھ رہے ہیں۔

اسپاٹ گولڈ کی قیمت 4,789.67 ڈالر فی اونس کے قریب برقرار رہی، جبکہ ہفتہ وار بنیاد پر اس میں تقریباً 0.9 فیصد اضافہ ریکارڈ کیا گیا۔ جون میں ڈیلیوری کے لیے امریکی گولڈ فیوچرز بھی 4,809.30 ڈالر کی سطح پر بغیر بڑی تبدیلی کے ٹریڈ ہوتے رہے۔

عالمی سیاسی صورتحال میں بھی کچھ اہم پیش رفت سامنے آئی ہے۔ لبنان اور اسرائیل کے درمیان 10 روزہ جنگ بندی جمعرات سے نافذ ہو چکی ہے۔ دوسری جانب امریکی صدر نے عندیہ دیا ہے کہ امریکا اور ایران کے درمیان مذاکرات کا اگلا دور ہفتے کے آخر میں ہو سکتا ہے۔

ماہرین کے مطابق سرمایہ کار اس وقت براہ راست امریکا ایران مذاکرات کے نتائج کے منتظر ہیں۔ اگر جنگ بندی برقرار رہتی ہے یا مذاکرات میں مثبت پیش رفت ہوتی ہے تو تیل کی قیمتوں اور مہنگائی کے دباؤ میں کمی آ سکتی ہے، جس کا اثر سونے کی مارکیٹ پر بھی پڑے گا۔

امریکی ڈالر گزشتہ سیشن میں چھ ہفتوں کی کم ترین سطح کے بعد کچھ مستحکم ہوا، تاہم مجموعی طور پر یہ مسلسل دوسرے ہفتے کمزور رہا ہے۔ کمزور ڈالر کے باعث دیگر کرنسی رکھنے والے سرمایہ کاروں کے لیے سونا نسبتاً سستا ہو جاتا ہے، جس سے طلب میں اضافہ ہوتا ہے۔

توانائی کی عالمی قیمتوں میں بھی کمی دیکھی گئی ہے، کیونکہ مشرق وسطیٰ میں کشیدگی کم ہونے کی امیدیں بڑھ رہی ہیں۔ یاد رہے کہ فروری میں جنگ شروع ہونے کے بعد تیل کی قیمتوں میں اضافہ ہوا تھا جس کے باعث سونا بھی دباؤ میں آیا تھا۔

اگرچہ سونا عام طور پر مہنگائی اور معاشی غیر یقینی صورتحال کے خلاف محفوظ سرمایہ کاری سمجھا جاتا ہے، لیکن بلند شرح سود اس کی کشش کو کم کرتی ہے کیونکہ یہ کوئی منافع نہیں دیتا۔ اس وقت مارکیٹ میں امریکی فیڈرل ریزرو کی جانب سے دسمبر میں شرح سود میں 25 بیسس پوائنٹس کمی کے امکانات کم ہو کر 27 فیصد رہ گئے ہیں۔

ماہرین کا کہنا ہے کہ مختصر مدت میں سونے پر دباؤ برقرار رہ سکتا ہے، تاہم عالمی سیاسی کشیدگی اور غیر یقینی حالات کے باعث یہ 3,500 ڈالر فی اونس سے اوپر مستحکم رہ سکتا ہے۔

دیگر قیمتی دھاتوں میں چاندی 0.2 فیصد کمی کے ساتھ 78.26 ڈالر فی اونس رہی، مگر یہ بھی مسلسل چوتھے ہفتے اضافے کی طرف ہے۔ پلاٹینم 0.5 فیصد کمی کے ساتھ 2,075.30 ڈالر اور پیلیڈیم 0.1 فیصد اضافے کے ساتھ 1,552.91 ڈالر پر پہنچ گیا، اور دونوں دھاتیں بھی مسلسل مثبت رجحان دکھا رہی ہیں۔